Qyrǵyzstannyń alty mıllıonynshy turǵyny ómirge keldi
BІShKEK. QazAqparat - Oshta dúnıe esigin jańa ashqan náreste Qyrǵyzstannyń alty mıllıonynshy turǵyny atandy.
Qyrǵyzstannyń alty mıllıonynshy azamatshasy Osh qalasynda áskerı qyzmetshi Almaz Kojoshevtiń otbasynda dúnıege keldi. Náresteniń anasy Rahat Belekovanyń da, balanyń da jaǵdaıy jaqsy. Náreste salmaǵy 3 keli 870 gramm.
Prezıdent Almazbek Atambaev qýanysh ıelerin quttyqtap, balaǵa myqty densaýlyq, uzaq ta baqytty ómir tiledi, dep habarlady QR Prezıdenti baspasóz qyzmetinen.
Memleket basshysy alty mıllıonynshy turǵynnyń ómirge kelýi - barsha Qyrǵyzstan halqy úshin úlken qýanyshty jańalyq ekenin aıtty. «Halyq sanynyń ósýi - beıbit ómirdiń basty kórsetkishteriniń biri, eldiń keleshegine degen senimi, adamdardyń izgilikke, gúldenýge umtylysy», - dedi ol.
Prezıdent úkimetke alty mıllıonynshy turǵynnyń otbasyna onyń quramyn esepke alyp, baspana berýdi tapsyrdy.
Budan basqa, Atambaev alty mıllıonynshy qyrǵyzstandyqqa 1 mln som depozıt esepshotyn ashyp, onymen qatar dúnıege kelgen 10 náresteniń otbasyna 100 myń somnan birjolǵy materıaldyq kómek kórsetýdi tapsyrdy.
Memleket basshysy baqytty ata-analarǵa quttyqtaý jedelhatyn jiberip, Qyrǵyzstan halqyna da quttyqtaý sózin arnady.
