Qyrǵyzstannyń Aqparat vıtse-mınıstri «QazAqparat» HAA jumysymen tanysty
ASTANA. QazAqparat - Qyrǵyzstan Respýblıkasynyń Aqparat, mádenıet jáne týrızm vıtse-mınıstri Aınur Temirbekova «QazAqparat» Halyqaralyq aqparat agenttiginiń jumysymen tanysty, dep habarlaıdy QazAqparat tilshisi.
«Biz qazaqstandyqtardy óz elimizde kórýge árdaıym qýanyshtymyz. Qyrǵyzstan meımandar úshin qashan da ashyq. Halyqtarymyz dostyǵynyń tarıhy tereńde jatqandyqtan, ózara qarym-qatynasymyzdy joǵary qoıamyz», - dedi Aınur Temirbekova «QazAqparat» HAA bas dırektory Asqar Ýmarovpen kezdesý kezinde.
Aınur Temirbekova «QazAqparat» HAA ujymyna qonaqjaılylyǵy úshin alǵysyn bildirip, aqparat agenttiginiń qyrkúıekte ótken ІІІ Dúnıejúzilik kóshpendiler oıynynan aqparat taratýdaǵy aıtýly úlesin erekshe atap ótti.
«Jalpy, Kóshpendiler oıyny týraly Qazaqstandaǵy 10 BAQ habar taratty. Munyń bári de bizdiń qarym-qatynasymyzdyń jarqyn keleshegine úmittenýge múmkindik beredi. Qyrǵyzstandyqtar sizderdiń elderińizden meımandardy óz úıinde kórýge qashanda qýanyshty», - dedi vıtse-mınıstr.
Eske sala ketsek, bıylǵy qyrkúıek aıynda Qyrǵyzstanda III Dúnıejúzilik kóshpendiler oıyndary ótti. Oǵan álemniń 80 elinen 3 myńnan astam sportshy qatysqan edi. Olar sporttyń 37 túrinen ózara synǵa tústi. Saıystyń qorytyndysy boıynsha Qazaqstan komandasy 72 medalmen ekinshi orynnan kórindi. Ulttyq quramamyz sporttyń 32 túrinen baq synap, 18 altyn, 24 kúmis, 30 qola medal ıelendi. Kelesi Kóshpendiler oıyndarynyń kezegi Túrkııa memleketine tabystaldy. Jarys 2020 jyly ótedi.
