Qyrǵyzstannan jetkiziletin ónim sapasy syn kótermeıdi - Bekshın

ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın Qazaqstanǵa jetkiziletin qyrǵyzstandyq ónimderdiń sapasy nasharlaǵanyn aıtty, dep habarlaıdy QazAqparat.

«Qyrǵyzstan ónimderiniń nasharlaýy úrdisi baıqalyp otyr. Eger de ótken jyly talapqa saı emes ónimniń úlesi 4 paıyz bolsa, al bıyl osyndaı ónimniń 10 paıyzǵa jýyǵy anyqtaldy. ıAǵnı, qyrǵyzstandyq ónimniń sapasy men qaýipsizdigi 2,5 esege nasharlady», - dedi Bekshın Ortalyq kommýnıkatsııalar qyzmetinde ótken baspasóz máslıhatynda.

Onyń sózine qaraǵanda, talapqa saı emes ónimniń jalpy kóleminde 52 paıyzy Reseıge tıesili, odan keıingi orynda Qyrǵyzstan tur. Degenmen RF-ten jetkiziletin taýar men ónim kólemi aıtarlyqtaı joǵary.

Qoǵamdyq densaýlyq saqtaý komıteti tıisti zertteý júrgizip, Qyrǵyzstandaǵy ónimderdiń tehnıkalyq reglament kórsetkishterine sáıkes kelýin tyńǵylyqty qarap shyqqan.

«Osy baǵyttaǵy zertteýler Qyrǵyzstan tarapynan talapqa saı emes ónimniń tasymaldanýy táýekeli bar ekenin kórsetip otyr. Sondyqtan da Aýyl sharýashyly mınıstrligindegi, kedendik organdardaǵy áriptestermen birlese tıisti baqylaýdy júrgizýdemiz», - dedi Komıtet basshysy.