Qyrǵyzstannan zańsyz ótkizilmek bolǵan 1 tonna qus eti tárkilendi
ASTANA. 1 qarasha. QazAqparat - Qordaı shekara otrıady «Qordaı» zastavasynyń jasaǵy Qazaqstan Respýblıkasynyń Memlekettik shekara syzyǵynan 5 metr jerde eki avtokólikti ustady. Qyrǵyzstannyń memlekettik nómirin ıelengen «Mıtsýbısı Delıka» markasyndaǵy eki avtokóliginen jalpy salmaǵy 1 tonnany quraıtyn qus eti tárkilendi. Bul týraly QR Ulttyq qaýipsizdik komıteti Shekara qyzmetiniń baspasóz ortalyǵynan habarlandy.
«Kontrabandalyq júkti artyp jatqan onshaqty adam shekara jasaǵyn baıqaı salysymen qasha jónelgen. Sosyn olar shekaramen shektes aýmaqta rezeńkeli sý qaıyqqa otyryp, izderin jasyryp úlgerdi. Atalǵan fakti boıynsha Qordaı aýdany Gvardııa garnızonynyń quqyq qorǵaý organdary qulaqtandyryldy», - delingen baspasóz habarlamasynda.
Qazirgi ýaqytta oryn alǵan oqıǵaǵa qatysty tergeý jumystary júrgizilýde.
