Qyrǵyzstannan vırýs juqtyryp kelgen Qordaıdyń eki turǵyny jazylyp, úıine shyqty
QORDAI. QazAqparat - Búgin koronavırýstan aıyǵyp ketken 11 adamnyń ishinde Qordaı aýdanynyń eki turǵyny bar, dep zhabarlaıdy QazAqparat Memkomıssııanyń shuǵyl shtabyna silteme jasap.
Emdelýshilerdiń biri 1974 jylǵy, ol bıyl 27 naýryzda aýrýhanaǵa jatqyzylǵan edi. Oǵan deıin bir kún buryn ol otbasymen Qyrǵyzstan Respýblıkasynan oralǵan.
Bekitilgen algorıtmge sáıkes atqarylǵan jumystyń arqasynda shekaradan ótken sátten bastap bes adamnan turatyn osy otbasy karantındik statsıonarǵa oqshaýlandy. Zerthanalyq taldaýlardyń nátıjesinde vırýs osy azamattyń ǵana azǵasynan tabyldy, otbasynyń basqa músheleri vırýsty juqtyrmaǵan.
Ekinshi emdelýshi 1996 jyly týǵan, ol da 27 naýryz kúni Qyrǵyzstan Respýblıkasynan kelgen boıda aýrýhanaǵa jatqyzylǵan.
Olar eki apta ishinde qajetti em alyp, ınfektsııalyq statsıonarda jatty. Olardyń densaýlyǵy qanaǵattanarlyq jaǵdaıda. Baqylaý taldaýlary emdelýshilerdiń aýrýdan aıyqqanyn rastady.
Osyǵan qaramastan, aldaǵy eki apta boıy olar úı karantıninde medıtsınalyq qyzmetkerlerdiń baqylaýynda bolady.
Búgingi tańda ınfektsııalyq statsıonarda 40 naýqas em alyp jatyr. Olardyń densaýlyǵy birqalypty.
Eske sala keteıik, dál qazirgi ýaqytta Qazaqstanda 79 adam koronavırýstan jazylyp, úıine shyqqanyn habarlaǵan bolatynbyz.
