Qyrǵyzstannan turmystyq elektr quraldaryn zańsyz ákelgenderge 1,8 mln teńge aıyppul salyndy
«EAEO sheńberinde beriletin sáıkestikti baǵalaý týraly qujatqa qatysty memlekettik baqylaýdy kúsheıtý jáne jalǵan sertıfıkat jasatýmen kúresý maqsatynda birqatar shara qolǵa alynyp jatyr. Sonymen qatar elge ákelinetin ónimge kameraldyq baqylaý, qaýipti ónim tizilimin pysyqtaý jáne ony Astana-1 keden qyzmetiniń aqparattyq júıesimen ıntegratsııalaý boıynsha jumys júrip jatyr. Bıyl qańtarda bizdiń komıtettiń buıryǵymen elimizge Qyrǵyzstannan ákelingen turmystyq elektr quraldarynyń ónimderi boıynsha (akkredıttelgen zerthanada synaqtan ótpegen) 12 zańsyz resimdelgen deklaratsııanyń kúshi joıyldy. Atalǵan ónimdi satý faktisi boıynsha aıyptylarǵa 600 AEK (1 837 800 teńge) kóleminde aıyppul salyndy», - dedi Qýanysh Elikbaev BAQ ókilderimen ótken baspasóz máslıhatynda.
Onyń aıtýynsha, jalǵan sertıfıkatpen kúres máselesi erekshe baqylaýda.
«Qyrǵyzstan elimen ekijaqty kelisimniń negizinde qyrǵyz ımporttaýshylaryna zańsyz berilgen 12 sáıkestik deklaratsııasy týraly málimet joldandy. Biz usynǵan málimetter negizinde qyrǵyz tarapy sáıkestikti baǵalaý týraly qujattardy tirkeý júıesine qol jetkizýdi shektep, «InterSert» sertıfıkattaý jónindegi organ (Bishkek qalasy) attestatyn qoldanýdy toqtatty. Osylaısha, ekijaqty is-qımyl qaýipti ónimniń aldyn alý jáne jalǵan sertıfıkatpen kúreste óz tıimdiligin kórsetti», - deıdi ol.
Buǵan deıin komıtet basshysynyń orynbasary elimizge syrttan keletin taýarlarǵa baqylaý qalaı júretini týraly aıtty .
Sondaı-aq, taýary sertıfıkattalmaǵan ımporttaýshylarǵa 6,2 mln teńgege aıyppul salynǵany aıtyldy .
Odan bólek, ótken jyly elimizge 41,2 mlrd AQSh dollarǵa taýar ákelingeni habarlandy .
