Qyrǵyzstannan sıyr urlap ótpek bolǵannyń joly kesildi

ASTANA. QazAqparat - Qazaqstandyq shekarashylary qazaq-qyrǵyz shekarasynan iri qaralardy zańsyz aıdap ótpek bolǵan adamnyń jolyn kesti, dep habarlady QR UQQ Shekara qyzmetinen.

«Qordaı» shekara otrıadyna qarasty «Qarasaı batyr» zastavasynyń (Jambyl oblysy) shekara narıady memlekettik shekaradan 10 metr qashyqtyqqa ótken iri qaralardy (sıyr) ustady.

Naqtyraq aıtqanda, kórshiles qyrǵyz elinen 3 bas sıyrdy qýalap kele jatqan belgisiz atty adamnyń aldynan shekara narıady shyǵa kelgende, ol sıyrlaryn tastaı qashyp, kelgen jaǵyna baryp, boı tasalady. Atalǵan derek boıynsha Jambyl oblysy Qordaı aýdanynyń quqyqqorǵaý organdary habarlandyryldy. Tergeý amaldary júrgizilýde.