Qyrǵyzstannan kelgen 5 jasar qyz pavlodarlyqtardy tań qaldyrdy
PAVLODAR. QazAqparat - Estaı Berkimbaevtyń 150 jyldyq mereıtoıynda óner kórsetken ashyq aspan astyndaǵy tsırk Pavlodarǵa jol tartpaq, dep habarlaıdy pavlodarnews.kz.
Aqynnyń mereıtoıyna arnalǵan is-sharaǵa darshylar kezdeısoq tap bolǵan. Top jetekshisi Shámshidın Hojımatovtyń aıtýynsha, olar Qaraǵandyda gastroldik saparmen júrip, Ekibastuz qalasyna at basyn burǵan. Bul jaqta mereıtoıda óner kórsetý týraly usynys túsken. Ásirese, 5 jastaǵy qyzdyń óneri qonaqtardyń kóńilinen shyqty.
«Bul meniń Bıbisara atty nemerem, - dedi Shámshidın Hojımatov. Onyń bıiktikte júrgenine birneshe jyl boldy. Ázirge ol tek qana úlken adamdarmen birlese óner kórsetedi. Al 6 jasar nemerem Behrýzbek kerilgen arqannyń ústine jalǵyz shyǵady».
Darshylar otbasy 25 jyl boıy gastrolge shyǵyp júr. Osy ýaqyt ishinde top Reseıdiń jartysyn aralap shyqqan. Sonymen qatar, Ýkraına men Belarýs elinde bolǵan. «Biz Qazaqstanda óner kórsetkendi unatamyz. Bizdi munda únemi jyly qarsy alady», - dedi darshylar.
Pavlodar oblysynda sońǵy ret darshylar 20 jyl buryn bolǵan. Ashyq aspan astyndaǵy tsırkti pavlodarlyqtar jaqyn arada tamashalaı alady.
