Qyrǵyzstannan Qazaqstanǵa mal aıdap ótpek bolǵandar ustaldy
ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttigi Ulttyq bıýrosynyń Jambyl oblysy boıynsha departamenti shekaradan zańsyz mal asyrý qylmysynyń jolyn kesti. Bul týraly vedomstvonyń baspasóz qyzmeti habarlaıdy.
Qylmystyń aldyn alýǵa UQK áskerı qarsy barlaý bóliminiń, Jambyl oblysy ІІD-niń uıymdasqan qylmyspen kúres basqarmasynyń jáne «Arlan» arnaıy bólimshesiniń kúshteri jumyldyrylǵan.
Málim bolǵandaı, Merki aýdanynyń keıbir turǵyndary Qyrǵyzstan Respýblıkasynda urlanǵan maldardy Qazaqstanda satý úshin memlekettik shekarany ótkizý pýnktterinen tys jerden zańsyz kesip ótetinderi anyqtaldy.
Aǵymdaǵy jyldyń 1 sáýirinde túngi ýaqytta uıymdastyrylǵan is-sharanyń nátıjesinde Merki aýdanynyń turǵyndary 13 bas iri qara malyn shekaradan kedergisiz ótkizýdi qamtamasyz etýi úshin shekara qyzmetshisine para bergenderi rásimdeldi.
Para berýshilerdiń tapsyrmasy boıynsha Qyrǵyzstan aýmaǵynan memlekettik shekarany zańsyz kesip ótip, zańsyz jolmen mal basyn ótkizgenderi úshin shekara beketiniń aýmaǵynda 4 Qazaqstandyq azamat ustaldy.
Sonymen qatar, bir mezgilde para berýshi eki azamat ustaldy.
Qazirgi tańda, atalǵan tulǵalarǵa qatysty «kepil» túrindegi bultartpaý sharasy qoldanyldy.
Memlekettik shekarany zańsyz kesip ótý deregi boıynsha materıaldar jeke óndiriske bólinip, tergeý rettiligi boıynsha jiberiledi.
