Qyrǵyzstannan Qazaqstanǵa kiretin júk kólikteri neshe mınýtta tekseriledi
«Júk kóligin tekserý ýaqyty ózgermedi. Sebebi, QR Úkimetiniń qaýlysymen bekitilgen Memlekettik shekarany sanattaý qaǵıdalarynyń talaptaryna sáıkes, bir júk kóligin tekserýge 25 mınýt ýaqyt qarastyrylǵan. Qyrǵyzstannan bizdiń elge qazir kúnine 400-den 500-ge deıin júk kóligi kirip jatyr», - delingen QR Ulttyq qaýipsizdik komıtetiniń «QazAqparat» agenttigine bergen jaýabynda.
Qazaqstanǵa Qyrǵyzstannan júk kólikteri arqyly negizinen halyq tutynatyn taýarlar (kıim-keshek, aıaq kıim, keńse zattary, qaǵaz buıymdar jáne taǵy basqasy), jemis-kókónis ónimderi (qarbyz, qaýyn, qyzanaq, qııar jáne taǵy basqasy), sút ónimderi, qurylys materıaldary (boıaýlar, laktar, eritkishter) tasymaldanady.
«Júk kólikteriniń shamamen 60% tranzıt arqyly Qazaqstan Respýblıkasynan Reseı Federatsııasyna ótedi», - dep naqtylady komıtet.
Sondaı-aq málim etilgendeı, 2023 jyldyń basynan Qyrǵyzstannan kelgen kólikterge jasyryp, esirtki zattaryn tasymaldaýdyń 20-dan astam faktisi anyqtalǵan.
Aıta keteıik, Memlekettik shekara arqyly ótkiziletin taýarlardyń (júkterdiń) monıtorıngin QR Qarjy mınıstrliginiń Memlekettik kirister komıteti júzege asyrady.
Bıyl 21 tamyzda Qazaqstan men Qyrǵyzstan shekarasyndaǵy baqylaý-ótkizý pýnktiniń aldynda júk kólikteri keptelip turǵany habarlanǵan edi.
Keıin Ulttyq qaýipsizdik komıteti shekarada eshqandaı shekteý qoıylmaǵanyn málimdedi.
