Qyrǵyzstannan Qazaqstanǵa qarý-jaraqtardyń ákelingeni týraly eshqandaı fakti tirkelgen joq- ІІM
ASTANA. Sáýirdiń 24-i. QazAqparat /Qanat Mámetqazyuly/ - Qyrǵyzstannan Qazaqstanǵa qarý-jaraqtyń ákelingeni týraly eshqandaı fakti tirkelgen joq. Búgin Qazaqstan Respýblıkasynyń Іshki ister mınıstrliginde ótken Parlament Májilisiniń kóshpeli Úkimet saǵatynda depýtattardyń saýalyna jaýap bergen QR Іshki ister mınıstri Serik Baımaǵanbetov osylaı málim etti,
dep habarlaıdy QazAqparat.
«Qyrǵyz elinde oqıǵalar oryn alǵannan beri biz qazaq-qyrǵyz shekarasyn japtyq. Shekaradan tek bizdiń elimizdiń aýmaǵyna ótetin Qazaqstan Respýblıkasynyń azamattaryn ǵana jiberip jatyrmyz. Elimizdiń ońtústigindegi krımınaldyq ahýal turaqty, eshqandaı da aıtarlyqtaı qoǵamdyq tártipti buzýshylyq pen qylmystar oryn alǵan joq», dep atap ótti mınıstr S. Baımaǵanbetov. Sonymen birge, ol Qyrǵyzstannan qarý-jaraqtardyń Qazaqstanǵa ákelinýi týraly eshqandaı da faktilerdiń oryn almaǵanyn aıtty. Mınıstrdiń sózine qaraǵanda, qazirgi ýaqytta shekaradaǵy baqylaý kúsheıtilgen. «Respýblıkada kóshi-qon zańnamasyn buzǵan azamattardy anyqtaýǵa arnalǵan jedel aldyn alý sharalary júrgizildi. Nátıjesinde birneshe myń adam Qazaqstan aýmaǵynan shyǵaryldy», dedi S. Baımaǵanbetov.
