Qyrǵyzstannan Qazaqstanǵa 1 tonna qus etin zańsyz alyp ótpek bolǵandar ustaldy

ASTANA. QazAqparat – Qazaqstan-Qyrǵyzstan memlekettik shekarasynda shamamen 1 tonna qus etin kontrabandalyq jolmen alyp ótpek bolǵandar ustaldy, dep habarlady QR UQK Shekara qyzmetiniń baspasóz qyzmetinen.

Vedomstvo aqparatyna qaraǵanda, zańbuzýshylyq 27 shilde kúni túngi saǵat shamamen 2-lerde oryn aldy. Taraz shekara otrıady «Grodekovo» zastavasynyń shekara jasaǵy qyzmettik mindetterin atqarý barysynda qaýipsizdiktiń shıyrshyq kedergisinen ótpek bolǵandardy anyqtaǵan.

«Shekara buzýshylardy ustaý barysynda olar boı tasalamaq boldy. Sondyqtan shekarashylarǵa travmatıkalyq qarýdy paıdalanýǵa týra keldi. Nátıjesinde kontrabandashylardyń «ÝAZ» kóligi jyraǵa túsip, aýdaryldy. Kólikten shamamen 1 tonna kontrabandalyq qus eti tabyldy»,- delingen habarlamada.

Qazirgi ýaqytta atalǵan fakti boıynsha mán-jaıdy anyqtaý sharalary júrgizilýde.