Qyrǵyzstannan «gorilla» sýsyndaryn zańsyz ákelgen úsh kólik keri qaıtaryldy

NUR-SULTAN. QazAqparat - Jambyl oblysy boıynsha Memlekettik kiris departamentiniń qyzmetkerleri PD jol polıtsııasy qyzmetkerlerimen birlesip, Merki aýdany Andas batyr aýylynda Qyrǵyzstan Respýblıkasynyń tirkeý nómirimen úsh júk tıelgen «Mercedes-Benz» avtokóligin ustady,dep habarlaıdy QazAqparat.

Tekserý nátıjesinde atalǵan kólikterdiń Bishkek qalasynan shyqqandyǵy, «Sypataı batyr» baqylaý-ótkizý beketi arqyly ótkendigi anyqtaldy. Kólikterge tıelgen 28 800 banki «Gorilla» alkogolsiz sýsynnyń taýarǵa ilespe qujattary bolmaǵan.

Bul fakt boıynsha Jambyl oblysynyń memlekettik kirister organdarynyń qyzmetkerleri ákimshilik hattama toltyrdy. Kólikter keri, Qyrǵyzstanǵa qaıtaryldy.