Qyrǵyzstanmen shekarada jalǵan qujatpen taýar tasymaldap bara jatqan 6 júk kóligi ustaldy

NUR-SULTAN. QazAqparat - Memlekettik kirister komıteti 2022 jylǵy 1 sáýirde taýarǵa jalǵan ilespe qujattarmen halyq tutynatyn taýarlardyń (kıim, aıaq kıim, kosmetıka, ydys jáne t.b.) iri partııasyn Qazaqstanǵa ákelý áreketiniń joly kesildi, dep habarlaıdy QazAqparat Qarjy mınıstrliginiń baspasóz qyzmetine silteme jasap.

Qyrǵyz Respýblıkasynan kele jatqan 6 júk kóligine qatysty taqyryptyq salyqtyq tekserý júrgizý barysynda qujattarda Qazaqstan Respýblıkasynyń alýshysy retinde kórsetilgen kompanııanyń atalǵan taýarlardyń ımportyna eshqandaı qatysy joq ekendigi anyqtaldy.

Júrgizilgen tekserý aıasynda kompanııa basshysy ımportqa qatysy joqtyǵy týraly málimdeme jasady, osyǵan baılanysty atalǵan is boıynsha materıaldar taýarlardy memleket kirisine aınaldyrý maqsatynda sotqa jiberiletin bolady.

Memlekettik kirister komıtetiniń habarlaýynsha, ımportqa qatysy joq tulǵalardyń atyna taýarlardy ákelý áreketi ımportqa qosymsha qun salyǵyn tóleýden jaltarý úshin qoldanylady.

Qyrǵyz Respýblıkasymen ózara saýdada kóleńkeli taýar aınalymyn qysqartý maqsatynda birqatar jumys kezdesýleri ótkizildi.

Bul másele 2022 jylyǵy 15-16 aqpanda Almaty qalasynda ótken Qazaqstan Respýblıkasy men Qyrǵyz Respýblıkasynyń saýda-ekonomıkalyq yntymaqtastyǵy jónindegi jumys tobynyń otyrysy barysynda da qaraldy.

Nátıjeleri boıynsha Qyrǵyz Respýblıkasynyń Qarjy mınıstrligi janyndaǵy Memlekettik salyq qyzmeti 16 aqpannan bastap eksporttaýshylarda EAEO elderine eksporttaý kezinde tasymaldanatyn taýarǵa elektrondyq shot-faktýralardyń (EShF) bolýyn qamtamasyz etý jónindegi mindettemelerdi ózine aldy.

Degenmen, EShF-syz taýarlardy ótkizý faktileri jalǵasýda.

Mysaly, tek 27-31 naýryz aralyǵynda qytaı óndirisiniń halyq tutynatyn taýarlaryn tasymaldaǵan 345 júk mashınasynyń 268-i (78%) EShF-syz jóneltilgen. Qalǵan jaǵdaılarda EShF barlyq taýarǵa rásimdelmegen.

«Memlekettik kirister komıteti júrgizgen Qyrǵyz Respýblıkasynan kele jatqan júk avtokólik quraldaryna qatysty tekserýler Qazaqstan Respýblıkasy men Qyrǵyz Respýblıkasynyń saýda-ekonomıkalyq yntymaqtastyǵy jónindegi jumys tobynyń otyrysy barysynda qol jetkizilgen ýaǵdalastyqtarǵa sáıkes keletinin atap ótken jón, olarǵa sáıkes taqyryptyq salyqtyq tekserýler tasymaldanatyn taýarǵa EShF bolmaǵan kezde júrgiziledi»,-delingen habarlamada.