Qyrǵyzstanǵa saıahattaıtyn qazaqstandyq týrıster sany artty
ASTANA. QazAqparat - Qyrǵyzstannyń memlekettik shekara qyzmeti Qazaqstannan keletin jolaýshylar leginiń artqandyǵyn málim etti, dep habarlaıdy Kabar.
«Týrıstik maýsym bastalǵaly qyrǵyz-qazaq memlekettik shekarasynan ótetin jolaýshylardyń, júk jáne kólik quraldarynyń sany artty», - dep habarlaıdy Qyrǵyzstan Respýblıkasy Memlekettik shekara qyzmetiniń qoǵammen jáne BAQ-pen baılanys bóliminen.
Eýrazııa ekonomıkalyq odaǵy elderi azamattary Qyrǵyzstanǵa kóp jaǵdaıda týrıstik maqsatpen (Ystyq kólge barý úshin) keledi.
Qazirgi ýaqytta Qyrǵyzstannyń Qazaqstanmen shekarasynda 8 baqylaý-ótkizý beketi jumys isteıdi: «Aqjol-avtojoly», «Aqtilek-avtojoly», «Tokmok-avtojoly», «Ken-Býlýn-avtojoly», «Chaldybar-avtojoly», «Qarqara-avtojoly», «Chon-Kapka-avtojoly», «Qaıyńdy-temirjoly».
Memlekettik shekaramen adamdardy, júkter men kólik quraldaryn ótkizý táýlik boıy júzege asyrylýda.
