Qyrǵyzstanǵa otandyq benzındi tasymaldaýdy bastaımyz - Qanat Bozymbaev

ASTANA. QazAqparat - QR Energetıka mınıstri Qanat Bozymbaev otandyq benzındi eksporttaý máselesi týraly aıtyp berdi, dep habarlaıdy QazAqparat tilshisi.

«Bıyl biz ózimizdiń munaı ónimderin kórshilerge tasymaldaýdy bastaımyz. Búgin Almatyda qyrǵyz áriptesterimizben aradaǵy kelissózder aıaqtalyp jatyr. Kelesi aptada Senatta Qazaqstan men Reseı arasyndaǵy kelisimdi ratıfıkatsııalaý máselesi qaralady. Buǵan deıingi qujatta óz elimizden munaı ónimderin eksporttaýǵa tyıym salynǵan bolatyn. Al jańa kelisim ol shekteýdi alyp tastap, ekportymyzǵa jol ashatyn bolady. Sondyqtan, shamamen naýryz aıynda, osy toqsannyń aıaq jaǵyna qaraı biz eksportty bastaıtyn shyǵarmyz», - dedi Q.Bozymbaev qoǵamdyq keńestiń otyrysynda.

Mınıstrdiń aıtýynsha, munaı óńdeý zaýyttaryn modernızatsııadan ótkizgennen keıin daıyn ónimniń kólemi artqan. Al, eń bastysy, janar-jaǵarmaıdyń sapasy K-4 jáne K-5 dárejesine deıin kóterildi.

«Negizi, aǵymdaǵy jyldyń birinshi toqsanynda bizde benzın artyǵymen óndiriledi. Mazýt ta, áýekerosıni de solaı. Sondyqtan biz munaı ónimderin kóbinese Ortalyq Azııa elderine tasymaldaýdy josparlap otyrmyz. Bárimiz jaqsy bilemiz, Qazaqstan uzaq jyldar boıy munaı ónimderi boıynsha netto-ımporter boldy. Munaı óndirýshi memleket bolsaq ta, osy saladaǵy ónimderdi ımporttap keldik. Endi munaı óńdeý zaýyttaryn jańǵyrtqannan keıin óz ónimderimiz kóbeıdi. Sony eksportqa shyǵarý qajet», - dep atap kórsetti Q.Bozymbaev.