Qyrǵyzstanǵa em alýǵa barǵan naýqas balalar 24 naýryzda elge jetkiziledi
ATYRAÝ. QazAqparat – Qyrǵyzstanda naýqas balasymen elge qaıta almaı qalǵan analar 24 naýryzda Atyraýǵa jetkiziletin boldy, dep habarlaıdy QazAqparat.
Aıta keteıik, buǵan deıin QR Syrtqy ister mınıstrligi balalary sal aýrýyna shaldyqqan atyraýlyq toǵyz áıel Bishkekte qalyp qoıǵanyn habarlaǵan edi. Olardyń bári Qyrǵyzstanǵa em alýǵa barǵan. Biraq olar úıge qaıtamyz dep otyrǵan reıs keıinge qaldy. Sondyqtan balalar men analardy áskerı avıatsııa bortymen elge jetkizý josparlandy.
«Qazaqstannyń Qyrǵyzstandaǵy elshiliginiń qyzmetkeri Jasulan Hanalıev bizben únemi baılanysyp otyrdy. Ol áskerı ushaq Bishkek áýejaıyna 23 naýryzda ushyp keletinin habarlady. Al 24 naýryzda biz úıimizge jetemiz. Bortta bizdiń janymyzda dáriger bolady», - dep habarlady bir balanyń anasy Gúljan Qusaıynova.
