Qyrǵyzstandyqtardyń 30,8 paıyzynda SARS-CoV-2 vırýsyna antıdene bar ekeni anyqtaldy
NUR-SULTAN. Kabar-QazAqparat – Qyrǵyzstannyń Densaýlyq saqtaý mınıstrligi turǵyndardy koronavırýs ınfektsııasyna qatysty seroepıdemıologııalyq zertteýdiń birinshi kezeńin aıaqtady, dep habarlaıdy QazAqparat Qyrǵyzstannyń Kabar agenttigine silteme jasap.
Mınıstrliktiń málimetinshe, atalǵan zertteý bıylǵy jyldyń shilde-qazan aılary aralyǵynda Qyrǵyzstandaǵy Dúnıejúzilik densaýlyq saqtaý uıymy keńsesiniń tehnıkalyq qoldaýymen júrgizilgen.
Zertteýdiń maqsaty – Qyrǵyzstan turǵyndarynyń jynysy, jasy jáne geografııalyq taralýyna qaraı COVID-19 ınfektsııasyna popýlıatsııalyq ımmýnıtetin zertteý.
Zertteý qorytyndysy respýblıkada jalpy alǵanda SARS-CoV-2 vırýsyna antıdene bar adamdardyń sany tamyz aıynyń basyna qaraı 30,8 paıyzdy quraǵanyn kórsetti. Bul vırýsqa seroprevalenttiliktiń (popýlıatsııadaǵy naqty aýrýdyń serologııa synama (qan sarysý) testinde oń nátıjesi bar adamdar) joǵary deńgeıi Naryn oblysynda (62,7%), Shý oblysynda (50,3%), Talas oblysynda (49%), Ystyqkól oblysynda (46%) jáne Bishkek qalasynda (52,2%) atap ótildi.
Atalǵan vırýs antıdenesin anyqtaýdyń tómen kórsetkishi respýblıkanyń ońtústigindegi Batken oblysynda (13%), Jalal-Abad oblysynda (13,0%), Osh oblysynda (16,3%) jáne Osh qalasynda (14,6%) tirkelgen. Ońtústik aımaq turǵyndarynda antıdene deńgeıiniń tómen paıyzy bul aımaqtarda test shilde aıynyń basynda, ıaǵnı antıdene endi shyǵa bastaǵanda jasalǵanymen túsindiriledi. Soltústik aımaqtarda bolsa, taldaý shilde aıynyń sońy men tamyzdyń basynda jasalǵan.
Qazirgi málimet boıynsha, SARS-CoV-2 vırýsyna antıdenesi bar adamdardyń 70,8 paıyzynda COVID-19 vırýsynyń klınıkalyq belgisi bolǵan, sonyń ishinde 22,0 paıyzy medıtsınalyq kómekke júginip, 6,0 paıyzy aýrýhanaǵa jatyp shyqqan.
Qyrǵyzstannyń densaýlyq saqtaý mınıstrligi elde koronavırýs ınfektsııasymen kúres júrgizý sharalaryn arttyrýǵa septigin tıgizetin kóptegen suraqtarǵa jaýap alýǵa múmkindik beretin atalǵan zertteýdi jalǵastyrý josparlanyp otyrǵanyn atap ótti.
