Qyrǵyzstandyq Zıta, Gıta esimdi sıam egizderiniń biri dúnıeden ótti
ASTANA. QazAqparat - 29 qazan kúni Qyrǵyzstannyń Shý oblysynda turatyn sıam egizderiniń biri, 24 jastaǵy Zıta Rezahanova qaıtys boldy, dep habarlady «Komsomolskaıa pravda» gazeti.
Álemge Gıta, Zıta esimimen tanymal sıam egizderiniń biriniń densaýlyǵy 2011 jyldan beri nasharlap ketken. Onyń búıregindegi aýrý qozyp, bir kóziniń janary sóngen. Jeltoqsan aıynda qyzdardyń anasy Bishkektegi Ulttyq gospıtalda emdelgennen keıin olardy Máskeýge alyp barǵanymen, Reseı ǵalymdary kómek kórsete almady.
-Ekige ajyratylǵan sıam egizderiniń biri Zıtanyń aıaǵy men bóksesiniń jartysy joq. Zıtada sozylmaly sepsıs, ókpesi qabynǵan. Qoldaý kórsetkenderdiń barlyǵyna alǵys aıtamyn, - deıdi qyzdyń anasy Zýmrııat.
Eske sala keteıik, sıam egizderi Zıta, Gıta Rezahanovalar 1991 jyly 19 qazanda Shý oblysynda dúnıege kelgen. Olardyń tutas denesinde úsh aıaq, bir bókse bar. Olar týraly álem 2003 jyly Máskeýdegi Fılatov atyndaǵy Ortalyq balalar aýrýhanasynyń dárigerleri olardy ota arqyly ajyratqanynan keıin tanyp, bilgen. Zıta men Gıta deneleri ajyratylǵannan keıin uzaq ýaqyt ómir súre bilgen álemdegi sırek sıam egizderi.
