Qyrǵyzstandyq jýrnalıst G.Pavlıýkti urlaǵan qylmyskerler Almatydaǵy meıramhanada ustaldy - ІІM
ASTANA. Qazannyń 6-sy. QazAqparat /Arman Asqarov/ - Qyrǵyzstandyq jýrnalıst Gennadıı Pavlıýkti urlaý oqıǵasyna qatysy bar kúdiktiler Almaty qalasynda ustaldy. Bul týraly búgin ótken aptalyq brıfıngte QR Іshki ister mınıstrliginiń resmı ókili Qýanyshbek Jumanov málim etti,
dep habarlaıdy QazAqparat.
Q. Jumanovtyń sózine qaraǵanda, ótken aptada Almaty qalasy Krımınaldyq polıtsııa qyzmetkerleri júrgizgen arnaıy operatsııa barysynda meıramhanalardyń birinde qyrǵyzstandyq jýrnalıst Gennadıı Pavlıýkti urlaý oqıǵasyna qatysy bar eki kúdikti azamat ustaldy. 2009 jyly jeltoqsannyń 16-synda G.Pavlıýk aýyr dene jaraqattarymen emhanaǵa jetkizilip, sol jerde qaıtys bolǵan.
Aıta keteıik, aǵymdaǵy jyldyń basynda ótken baspasóz máslıhattarynyń birinde Q.Jumanov qyrǵyzstandyq jýrnalıst Gennadıı Pavlıýktyń ólimine qatysty birneshe azamattyń anyqtalǵandyǵyn jarııa etken bolatyn. Olardyń bári - Qyrǵyzstan azamattary. Atalǵan qylmystyq is boıynsha Qazaqstan men Qyrǵyzstannyń quqyq qorǵaý organdary birlesip jumys isteýde. Sondaı-aq Qyrǵyzstan óz tarapynan arnaıy tergeý tobyn qurǵan.
G.Pavlıýk - Qyrǵyzstandaǵy «Belyı parohod» gazetiniń negizin qalaýshy jýrnalıst. 2009 jyly jeltoqsannyń 16-sy kúni Almaty qalasyna issaparmen kelgen ol belgisiz sebeptermen Fýrmanov kóshesindegi úıdiń 6-shy qabatynan qulaǵan bolatyn. Sol kezde onyń qol-aıaǵy skotchpen baılaýly bolǵan.
