Qyrǵyzstandyq júrgizýshiler 47 jol apatyna sebepker boldy - Jambyl oblysy
TARAZ. QazAqparat – Jyl basynan beri Jambyl oblysynda kórshiles Qyrǵyz Respýblıkasy júrgizýshileriniń kinásinen 47 jol-kólik oqıǵasy oryn alyp, 13 adam ajal qushqan, dep habarlaıdy QazAqparat.
Jyl basynan beri Jambyl oblysy joldarynda jaqyn shet el júrgizýshileriniń kinásinen 51 jol apaty tirkelgen. Sonyń saldarynan 14 adam qaza taýyp, 99 adam ártúrli dene jaraqatyn alǵan. Bul oqıǵalardyń 92 paıyzyna Qyrǵyz Respýblıkasynyń júrgizýshileri jol bergen. Atap aıtsaq, olardyń qatysýymen 47 jol apaty oryn alyp, saldarynan 13 adam qaza tapty. 96 adam túrli jaraqat alǵan.
Atalǵan ókinishti oqıǵalar negizinen Qyrǵyz Respýblıkasy azamattarynyń Qazaqstan aýmaǵyndaǵy jol qozǵalysy erejelerin elemeýinen oryn alady.
«Osy úrdisti buzý úshin jeltoqsan aıynan bastap «Boryshker» jedel aldyn alý is-sharasy ótip jatyr. Shara aıasynda Jambyl oblysy polıtsııa departamentiniń zańsyz kóshi-qonǵa qarsy kúres boıynsha arnaıy jeke rotasynyń qyzmetkerleri «Aısha bıbi» ótkizý pýnktinde Qazaqstan Respýblıkasynyń zańnamasyn buzýǵa jol bergen azamattardy anyqtaýda. Olarǵa qatysty hattama jasalyp, sheshim qabyldaý úshin Jambyl oblysy Jambyl aýdandyq sotyna jiberilýde», - deıdi Jambyl oblysy polıtsııa departamenti kóshi-qon qyzmeti basqarmasynyń bastyǵy Arman Turdalıev.
Aıta keteıik, jyl basynan beri óńirde kórshiles eldiń júrgizýshileri jasaǵan 12548 jol erejesin buzý faktisi anyqtalyp, 79,3 mıllıon teńgeden astam aıyppul salynypty.
Kórshi eldiń keı azamattary bıyldyń ózinde jol qozǵalysy erejelerin birneshe ret buzǵan. Soǵan qaramastan sheteldik azamattar aıyppulyn tólemeı, oblys aýmaǵyna ýaqytsha ǵana kelip-ketip júr.
«Qazaqstan Respýblıkasynyń Azamattyq is júrgizý kodeksiniń 384-baby boıynsha kóshi-qonnan bólek, Qazaqstan zańnamasyn birneshe ret buzǵan shetel azamatyn elden deportatsııalaý túrindegi jaýapkershilik kózdelgen. Búgingi tańda Jambyl aýdanynyń soty Qyrǵyzstannyń 4 azamatyn elden shyǵarý týraly sheshim shyǵardy, sotta Qyrǵyz Respýblıkasynyń taǵy 2 turǵynyna qatysty materıaldar qaralýda»,- dep atap ótti A. Turdalıev.
