Qyrǵyzstandyq eńbek mıgranttarynyń kópshiligi Reseı men Qazaqstanda jumys isteıdi
BІShKEK. Qazannyń 29-y. QazAqparat /Vladımır Dobrovolskıı/ - Búgin qyrǵyzdyń Jogorký Kenesh májilisinde 2008 jyly qarashanyń 14-inde Kıshıneýde qol qoıylǵan «Eńbekshi-mıgranttar men olardyń otbasy músheleriniń TMD-ǵa qatysýshy memleketterdegi quqyqtyq mártebesi týraly konventsııany bekitý týraly» zań jobasy talqylandy.
Jogorký Keneshtiń baspasóz qyzmetiniń aqparaty boıynsha, osy másele boıynsha sóz sóılegen Qyrǵyz Respýblıkasynyń eńbek mınıstri Aıgúl Rysqulova, atalmysh Konventsııanyń TMD elderiniń aıasynda jumys kúshteriniń erkin júrip- turýyna jaǵdaı jasaýǵa, eńbek mıgranttary men olardyń otbasy múshelerine laıyqty jáne teńdeı jaǵdaı jasaýǵa baǵyttalǵanyn atap kórsetti.Bul qujatta sondaı-aq, shekaradaǵy jáne maýsymdyq eńbek mıgranttarynyń quqyqtary da kórsetilgen. Oǵan qosa, Konventsııa mıgranttar men olardyń otbasy músheleriniń densaýlyq saqtaý, salyq salý, zeınetaqymen qamtamasyz etý salalaryndaǵy quqyqtaryn qamtamasyz etý, mıgranttardy qaıtarý, eńbek mıgranttary týraly málimetter bazasyn jasaý jónindegi taraptardyń yntymaqtastyq salasyn anyqtaıdy.
Qyrǵyz mınıstri sondaı-aq, qyrǵyzstandyq eńbek mıgranttarynyń kópshiligi Reseı men Qazaqstanda jumys isteıtinin atap kórsetti. Onyń aıtýynsha, Reseıde 300 myń qyrǵyzstandyq eńbek etse, Qazaqstanda - 65 myń Qyrǵyzstan azamaty jumys isteýde. Biraq ta, táýelsiz sarapshylar resmı málimetterden 2-3 ese joǵary málimetter keltirip otyrǵanyn aıta ketý kerek.
Depýtattar atalmysh zań jobasyn qabyldaý qajettiligin atap kórsetip, ony qoldady.
