Qyrǵyzstandyq áıel ushaqtyń bortynda bosandy
ASTANA. QazAqparat - Qyrǵyzstandyq áıel ushaqtyń bortynda ul balany ómirge ákeldi. Bul týraly «Manas» áýejaıynyń baspasóz qyzmeti málim etti, dep habarlaıdy QazAqparat «Kabar» agenttigine silteme jasap.
Onyń deregi boıynsha, 7 shildede «Ýralskıe avıalınıı» áýe kompanııasynyń ushaǵy «Osh - Ekaterınbýrg» baǵyty boıynsha reıs jasaǵan.
«Ushaq aspanǵa kóterilgennen keıin jolaýshylardyń biriniń tolǵaǵy bastaldy. Bortserikter brıgadasy shuǵyl áreket etip, áıeldi áýe kemesinde bosandyryp aldy. Bári sátti ótti», - delingen habarlamada.
Ushaqtyń ekıpajy Oshqa qaıta oralǵany atalyp ótilgen. «Osh» áýejaıynda jańa bosanǵan áıel men sábıdi jedel járdem kútip alyp, olardy perzenthanaǵa jetkizgen.
