Qyrǵyzstandaǵy jaǵdaı: «Jappaı tártipsizdik» baby boıynsha is qozǵaldy
BІShKEK. QazAqparat – Bishkektegi «Ala-Too» ortalyq alańynda búgin ártúrli saıası partııalardyń jaqtastary men kóshbasshylary jınalyp, basqa saıası partııalardyń taraptaryn quqyqtyq qalypqa qaıtýǵa shaqyryp, talap qoıdy. Alaıda kóp ýaqyt ótpeı olardyń arasynda daý týyp, munyń arty jappaı tártipsizdikke ulasyp ketti, dep habarlaıdy QazAqparat Kabar agenttigine silteme jasap.
Bishkektiń ishki ister bas basqarmasynyń málimetine sáıkes, jappaı tártipsizdik kezinde belgisiz adamdar minberde turǵan azamattarǵa tas jaýdyryp, qarýdan oq ta atylǵan. Aldyn ala berilgen aqparat boıynsha eki adam oqtan jaralanyp, denesi men basynan da ártúrli jaraqat alǵan. Sonymen qatar, ınternet-basylymdarda osy alańda bolǵan azamattarǵa qarýdan oq atylǵany týraly vıdeo tarap júr.
Bishkektegi tártip saqshylary bul faktini tirkep, Qyrǵyz Respýblıkasynyń Qylmystyq kodeksiniń 264-baby (jappaı tártipsizdik) boıynsha sotqa deıingi tergeý amaldaryn bastaǵan. Tıisti saraptamalar taǵaıyndalǵan.
Aıta keterligi, saǵat keshki 18.45 shamasynda Ulttyq gospıtalge bes azamat túsken. Olar:
T. T. 1990 jyly týǵan;
M. N. 1991 jyly týǵan;
K. S. 1980 jyly týǵan;
T.F. 1985 jyly týǵan;
T.A. 1997 jyly týǵan.
Qazirgi ýaqytta osy oqıǵalar boıynsha tergeý jáne jedel-izdestirý jumystary júrgizilýde.
Eske salaıyq, jeksenbi, 4 qazan kúni Qyrǵyzstanda Jogorký Keneshke depýtattardy saılaý ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.
Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen. Keıingi málimet boıynsha, zardap shekken adamdar sany 911-ge jetti.
Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.
6 qazanda Qyrǵyz Respýblıkasynyń Prezıdenti Sooronbaı Jeenbekov eldegi saıası jaǵdaıǵa baılanysty málimdeme jasady.
