Qyrǵyzstandaǵy jaǵdaı tózimdilik máselesiniń udaıy nazarda bolýy qajettigin kórsetti - dóńgelek ústel
ASTANA. Tamyzdyń 10-y. QazAqparat /Aıdar Ospanalıev/ - «Qazaqstanda ýaqyt ótken saıyn dinniń de róli artyp otyr. Dinge ásirese jastar kóptep bet burýda», deıdi Mádenıet mınıstrliginiń Din isteri komıteti Halyqaralyq mádenıet jáne din ortalyǵynyń álemdik dinge qatysty jaǵdaıdy taldaý men monıtorıng bóliminiń bastyǵy Gúlnár Júnisova.
Bul týraly ol búgin Astanada «Jastar arasyndaǵy dinaralyq qatynas: problemalar, olardyń sheshilý joldary» atty taqyrypta ótken dóńgelek ústel otyrysynda málim etti.
Onyń aıtýynsha, elimizdiń qalyptasý jyldaryna kóz júgirtetin bolsaq, 1990 jyldarmen salystyrǵanda, Qazaqstan jastarynda qazir múmkindikter óte kóp. ıAǵnı elde olardyń jan-jaqty damýlaryna mol múmkindikter jasalǵan. «Menińshe, búginde álemniń kóptegen elderinde bar problema tek Qazaqstanda ǵana joq. Bul ultaralyq, dinaralyq tózimdilik. Buǵan biz kúndelikti ómirimizde jaqsy kóz jetkizip júrmiz. Al Qyrǵyzstanda bolǵan oqıǵalar bizge dinaralyq bolsyn, ultaralyq bolsyn basqadaı máselelermen baılanysty tózimdilik máselesin udaıy nazarda ustap otyrý qajettigin kórsetti», dedi bólim bastyǵy.
Onyń sózine qaraǵanda, elimizdiń syrtqy saıasaty da negizinen dıplomatııalyq, dostyq qarym-qatynasqa negizdelgen. Buny Memleket basshysy da basym baǵyt retinde qarastyrady. Bul baǵytta Prezıdent ásirese jastarǵa kóp úmit artyp otyr. «Elimizde sońǵy ótken Álemdik jáne dástúrli dinderdiń sezinde de dinaralyq tózimdilik máselesine, ásirese jastardy kóptep tartý máselesi aıtyldy», dedi G.Júnisova.
