Qyrǵyzstandaǵy tumaýmen baılanysty jaǵdaı jiti baqylaýǵa alyndy
BІShKEK. Qarashanyń 11-i. QazAqparat /Evgenıı Novıkov/ - Búgin Bishkekte Qyrǵyzstannyń densaýlyq saqtaý mınıstri Marat Mámbetov pen respýblıkanyń bas sanıtarlyq dárigeri Sabyrjan Ábdákárimovtyń qatysýymen A/H1N1 tumaýymen baılanysty jaǵdaıǵa arnalǵan baspasóz máslıhaty ótti.
Máslıhatqa qatysýshylar atap kórsetkendeı, Dúnıejúzilik densaýlyq saqtaý uıymynyń málimetteri boıynsha, álemde tumaýdyń epıdemıologııalyq jaǵdaıy asa kúrdeli. Qyrǵyzstanda da ýshyǵýda. Qarashanyń 10-daǵy jaǵdaı boıynsha A/H1N1 tumaýymen aýyrýdyń zerthanalyq rastalǵan 27 oqıǵasy tirkeldi, olardyń 24-i - shet elderden kelgender. Olar negizinen Reseıde jumys isteıtin Qyrǵyzstan azamattary. Taǵy 3 oqıǵa Qyrǵyzstannyń ózinde anyqtalyp otyr.
Barlyq naýqastarǵa der kezinde medıtsınalyq kómek kórsetildi. Statsıonarlyq jaǵdaıda emdelgen 17 adam jazylyp shyqty, qalǵandary áli em-dom qabyldaýda.
Qazirgi ýaqytta respýblıkada maýsymdyq tumaý men basqa da sýyq tııý aýrýlary indetiniń taralýyna jol bermeýge baǵyttalǵan sharalar kúsheıtilýde. Atap aıtqanda, 60 myńǵa jýyq doza «Inflıývak», «Grıppol» jáne t.b. dári vaktsınalary satyp alyndy. Dońyz tumaýyna qarsy preparattardyń, onyń ishinde «Tamıflıý» dárisiniń 190 myńǵa jýyq dozasynyń jetkizilimi týraly kelisim jasaldy. 2 mıllıondaı maska ákelinbek. Oǵan qosa, jergilikti kásiporyndar táýligine taǵy 5 myńdaı maska tigýdi josparlap otyr.
Qyrǵyz dárigerleriniń aıtýynsha, jalpy alǵanda eldegi jaǵdaı jiti baqylaýǵa alyndy.
