Qyrǵyzstandaǵy saılaý konstıtýtsııalyq reformadan keıin ótedi
BІShKEK. KABAR. QazAqparat – Qyrǵyzstan prezıdentiniń mindetin atqarýshy Sadyr Japarov «QR Prezıdenti men Joǵarǵy Keńes depýtattaryn saılaý týraly «Qyrǵyz Respýblıkasynyń Konstıtýtsııalyq Zańynyń keıbir normalarynyń qoldanylýyn toqtata turý týraly» QR Konstıtýtsııalyq Zańyna qol qoıdy. Bul týraly QazAqparat Kabar agenttigine silteme jasap habarlaıdy.
Qyrǵyzstannyń Joǵarǵy Keńesi atalmysh zańdy 2020 jyldyń 22 qazanynda qabyldady.
Bul Konstıtýtsııalyq zańdy qabyldaý qajettigi birqatar mán-jaılardan, sondaı-aq eldegi qalyptasqan qoǵamdyq-saıası ahýaldan týyndap otyr.
Qabyldanǵan zańda konstıtýtsııalyq reforma júrgizý aıaqtalǵanǵa deıin Joǵarǵy Keńes depýtattarynyń qaıta saılaýyn ótkizý tártibi reglamenttelgen «Joǵarǵy Keńes Prezıdentin jáne depýtattaryn saılaý týraly» Qyrǵyz Konstıtýtsııalyq Zańynyń 38 jáne 63-baptarynyń qoldanysyn toqtata turý kózdeledi. Joǵarǵy Keńes depýtattaryn saılaýdy ótkizý merzimi Konstıtýtsııalyq reforma júrgizilgennen keıin osy eldiń zańnamasyna sáıkes, biraq 2021 jylǵy 1 maýsymnan keshiktirmeı belgilenedi.
Eske salsaq, 4 qazan kúni Qyrǵyzstanda Jogorký Keneshke depýtattardy saılaý ótti.Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen. Keıingi málimet boıynsha, zardap shekken adamdar sany 911-ge jetti.
Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.
Osy oqıǵalardan keıin Joǵarǵy Keńestegi saılaý aǵymdaǵy jyldyń 20 jeltoqsanyna josparlanǵan bolatyn.
