Qyrǵyzstandaǵy referendým: Daýystardy esepteý aıaqtaldy
ASTANA. QazAqparat - Qyrǵyzstan konstıtýtsııasyna ózgerister engizý boıynsha ótken referendýmda ýchaskelik saılaý komıssııalary daýystardy qolmen esepteýdi aıaqtady, dep habarlaıdy «QazAqparat» HAA Reseı Jańalyqtary agenttigine silteme jasap.
Dúısenbi kúni Qyrǵyzstan Ortalyq saılaý komıssııasy baspasóz qyzmetiniń ókili Nurjan Shaıldobekov málim etkendeı, referendýmnyń negizgi maqsaty bılik tarmaqtary arasyndaǵy teńgerimdi ornatý jáne elde parlamentarızmdi nyǵaıtý bolyp tabylady. Referendýmmen bir ýaqytta respýblıkanyń 405 eldimekeninde jergilikti keneshke (keńes) saılaý ótti.
Aldyn ala qorytyndyǵa sáıkes referendýmǵa 1 mıllıon 200 myń saılaýshy qatysty, ıaǵnı tizimge engizilgenderdiń 42 paıyzy. Konstıtýtsııanyń ózgerisin 79,6 paıyz nemese 955 myń adam qoldady. 184 myń saılaýshy qarsy daýys berdi.
Nurjan Shaıldobekovtiń aıtýynsha, mundaı kórsetkishter referendým erkin ári demokratııaly ótkenin kórsetedi. Barlyq qatysýshylar bıometrııalyq sáıkestendirýden ótti. Al bıýlletenderdi elektrondy eseptegish jáshikter sanap shyqty, olar saılaý ýchaskeleri jabylǵan boıda málimetterdi avtomatty túrde OSK-ǵa jiberd. Alaıda, onymen bir mezgilde ýchaskelik saılaý komıssııalary barlyq bıýlletendi qolmen eseptep, «qaǵaz» hattamalardy qolmen toltyryp, OSK-ǵa berýi tıis.
Referendýmnyń sońǵy nátıjeleri hattamalardyń barlyǵy alynǵannan keıin, sondaı-aq daýys berý boıynsha barlyq sot úderisteri aıaqtalǵannan soń (eger olar týyndaǵan jaǵdaıda) jarııalanatyn bolady.
