Qyrǵyzstandaǵy referendým: 79 paıyz qyrǵyzstandyq prezıdenttik basqarýǵa kóshýdi qoldady

BІShKEK. Kabar – QazAqparat – Qyrǵyz Respýblıkasynda jergilikti ýaqytpen saǵat 20:00-da jergilikti kenesh saılaýy jáne jańa Konstıtýtsııa jobasy boıynsha referendým aıaqtaldy, dep habaraıdy QazAqparat Kabar agenttigine silteme jasap habarlaıdy.

Aldyn ala derekterge qaraǵanda, jergilikti keneshter saılaýyna 1 mln 24 myń 891 adam nemese turǵyndardyń 30,89% daýys bergen.

Al referendýmǵa 1 mln 61 myń 591 adam nemese 29,89% qyrǵyzstandyq daýys bergen.

Sál keıin Qyrǵyzstanda jańa Konstıtýtsııa jobasy boıynsha referendýmǵa 36,75% adam qatysqan týraly resmı málimet tarady. Bul týraly Qyrǵyzstannyń Ortalyq saılaý komıssııasynyń tóraǵasy Nurjan Shaıldabekova aıtty.

«Referendýmǵa qatysqandardyń 79,25% jańa Konstıtýtsııa jobasyn qoldap daýys berse, 13,69% qarsy bolǵan», - dedi ol.

Eske salsaq, buǵan deıin Qyrǵyzstanda jergilikti keneshterge saılaý jáne Konstıtýtsııa boıynsha referendým ótip jatqany týraly habarlaǵan bolatynbyz.

Qyrǵyzstan azamattaryna túrli tústegi eki blank, sondaı-aq jegilikti kenesh saılaýyna jáne referendýmǵa qatysý úshin bıometrııalyq sáıkestendirýden ótýge arnalǵan eki chek berildi.

Jogorký Kenesh depýtattary «Qyrǵyz Respýblıkasynyń Konstıtýtsııasy týraly» Zań jobasy boıynsha referendým (búkilhalyqtyq daýys berý) taǵaıyndaý týraly» zań jobasyn maquldap, referendýmdy ótkizý merzimin bekitti.

Jańa Konstıtýtsııa jobasyndaǵy basty aıyrmashylyq – prezıdenttik basqarý nysanyna kóshý.

Sondaı-aq depýtattar sanyn 120-dan 90-ǵa deıin qysqartý usynylyp otyr.