Qyrǵyzstandaǵy eń uzyn, boıy 2 metr 32 santımetr adamǵa jeke dáriger bólindi
ASTANA. QazAqparat - Qyrǵyzstan elindegi boıy eń uzyn adam Jeńishbek Raıymbaevqa jeke medıtsınalyq qyzmetker bólindi. Ol naryndyq alyptyń jaǵdaıyn bilý úshin kúnine eki ret barady.
Bul týraly sársenbi kúni QR Densaýlyq saqtaý mınıstrligine silteme jasaǵan KırTAG habarlaıdy.
«27 mamyrda Naryn oblystyq birlesken aýrýhanasynyń hırýrg, endokrınolog jáne terapevt dárigerleri Qyrǵyz Respýblıkasynyń eń bıik adamy - Jeńishbek Raıymbaevty tekserdi. Ol densaýlyq jaǵdaıy boıynsha statsıonarlyq emdeýge muqtaj. Biraq patsıenttiń jaqyndary ony aýrýhanaǵa jatqyzý usynysynan bas tartty. Osyǵan baılanysty aýrýhana basshylyǵy oǵan kúnine eki ret baratyn medıtsınalyq qyzmetkerlerdi bóldi», - dep habarlady eldiń Densaýlyq saqtaý mınıstrliginen.
Jeńishbek Raıymbaev - ǵalamshardaǵy boıy eń uzyn adamdardyń biri. Onyń boıy - 2 metr 32 sm (basqa málimetter boıynsha, 2 metr 36 sm). 1979 jylǵy 23 mamyr kúni Naryn oblysyndaǵy Aqdala aýdanynyń Aqqııa aýylynda dúnıege kelgen.
