Qyrǵyzstandaǵy Boom shatqalynda sel júrdi
BІShKEK. KABAR-QazAqparat – Boom shatqalyndaǵy Bishkek-Naryn- Torýgart avtojolynyń 136-shaqyrymynda saǵat 16:30-da kólemi shamamen 600 tekshe metr bolatyn sel júrdi, dep habarlaıdy QazAqparat Kabar agenttigine silteme jasap.
Qyrǵyz Respýblıkasy Kólik jáne kommýnıkatsııa mınıstrliginiń málimetinshe, aldymen joldyń eki baǵytynda da kólik qozǵalysy tolyǵymen toqtatyldy. Saǵat 17:10-nan bastap Bishkek baǵytyndaǵy kólik qozǵalysyna ruqsat etildi.
«Sel tasqyny saldaryn joıý úshin oqıǵa ornyna bir júk tıegish bardy», - delingen habarlamada.
30 shildede Shý oblysynyń Kemın aýdanynda Bishkek-Naryn-Torýgart tas jolynda sel júrgen bolatyn. Sol kezde sel saldarynan temirjol shaıylyp ketip, Bishkek-Balyqshy baǵytyndaǵy poıyz qatynasy toqtatylǵan edi.
Foto: kabar.kg
