Qyrǵyzstandaǵy «Ata-Beıit» memorıaldyq kesheninde jerlengen qýǵyn-súrgin qurbandary arasynda qazaqtar da bar
ALMATY. 27 mamyr. QazAqparat - Qyrǵyzstanda stalındik qýǵyn-súrgin qurbany bolǵan 20 myńnan astam adamnyń qazirgi tańda tek 7 myńynyń ǵana aty-jóni anyqtalǵan. Bul týraly Shý oblysynyń Alamýn aýdany Tash Dobo aýylyndaǵy «Ata-Beıit» repressııa qurbandary memorıaldyq kesheniniń dırektory Gúlnar Tursynbekova QazAqparat tilshisine bergen suhbatynda aıtty.
«Ata-Beıit» qýǵyn-súrgin qurbandary memorıaldyq kesheni 2000 jyly Qyrǵyz Respýblıkasynyń Tuńǵysh Prezıdenti Asqar Aqaevtyń bastamasymen salynǵan bolatyn. Ol Qyrǵyzstandaǵy 1930 jyldardaǵy stalındik qýǵyn-súrgin qurbandary kómilgen el aýmaǵyndaǵy jalǵyz baýyrlastar zıraty. Memorıaldyq keshenniń dırektory G.Tursynbekovanyń aıtýynsha, onda 137 kisiniń súıegi jatyr. Bári bir túnde atylyp, osy jerge jasyryn kómilgen. Al týǵan-týystaryna Sibirge jer aýdaryldy, kezdesýge bolmaıdy dep tek 20 jyldan keıin ǵana atylǵany týraly anyqtama berilgen.
«Qurban bolǵandar arasynda mádenıet mınıstri Asanbaı Jamansarıev, ekonomıka mınıstri - Erkinbek Esenamanov, ádilet mınıstri Qaratal Tabyldıev, el aǵartý mınıstri Osmanqul Alıev, saýda mınıstri Tórequl Aıtmatov, Qyrǵyzstandaǵy Alashorda partııasynyń jetekshisi Ábdikerim Sydyqov sııaqty qyrǵyz halqynyń sút betine shyǵar qaımaqtary bar. Sondaı-aq eldi órkendetýge shetten kómekke kelgen ózge ult pen ulystyń ókilderi de az emes. Olardyń ishinde qazaqtar da bar. Sonyń biri Ahmet Mámetov esimdi azamat», - deıdi Gúlnar Sadyqqyzy. Dırektordyń sózine qaraǵanda, Qyrǵyzstandaǵy stalındik qýǵyn-súrgin qurbany bolǵan 20 myńnan astam adamnyń qanshasy opat bolǵany, qanshasy aman qalǵany týraly áli kúnge deıin belgisiz bolyp kele jatyr.
