Qyrǵyzstanda jol jıegine kólik qaldyrǵan júrgizýshi jaýapqa tartylady
ASTANA. QazAqparat - Qyrǵyzstanda endi kólikpen belgilenbegen jerge toqtasańyz, zań aldynda jaýap beresiz. Ákimshilik kodekske osyndaı jańa bap qosyldy.
ıAǵnı kóligin jol jıegine tastap ketken azamattar temir tulparyn aıyp turaǵynan izdeıtin bolady. Qazirgi tańda tek Bishkektiń ózinde 400 myńǵa jýyq kólik bar. Olardyń kóbi belgilenbegen jerge toqtaýdy mashyqqa aınaldyrǵan. Endi ondaı erkindikke jol joq. El úkimeti aldaǵy úsh aı kóleminde zańnamany bekitip, kúshine engizbek.
«Jol belgileriniń astynda evakýator jumys isteıtindigi týraly aqparat ilinedi. Eger zańǵa qulaq aspasa, kóligin aıyp turaǵyna alyp ketedi», - deıdi Qyrǵyzstan patrýldik mılıtsııa bóliminiń basshysy Nur Satybaldıev.
Jańa zań respýblıkanyń barlyq aımaǵyna qatysty bolmaq. Májbúrli evakýatsııa kezinde kóliktiń ıesi bolýy shart emes, dep jazady 24.kz. Al zańger mamandar protokol toltyrý tártibine erekshe mán berý kerek deıdi. «Tyıym salynǵan jerlerge tosqaýyl qoıý kerek. Sońǵy kezde tipti jaıaý júrginshiler men baǵdarshamnyń mańyna kóligin qoıyp ketetindi shyǵarǵan. Ol óz kezeginde kóptegen kedergiler keltiredi», - deıdi zańger Qaırat Osmonalıev.
Aldaǵy úsh aıdyń kóleminde jeke evakýatsııalyq kompanııalarmen kelisimshart jasasý júrgiziledi. Buǵan deıin jergilikti mılıtsııanyń kólikti evakýatormen alyp ketýge quqy bolmaǵan. «Endi joldaǵy tártip te bir qalypqa túsedi», - deıdi mamandar.
