Qyrǵyzstanda jol erejesin óreskel buzǵandarǵa jaza qataıtyldy
BІShKEK. QazAqparat – Qyrǵyzstanda 2023 jyldyń 8 naýryzynan bastap jol erejesin óreskel buzǵandarǵa salynatyn aıyppul kólemi ulǵaıdy, dep habarlaıdy QazAqparat menshikti tilshisi Qyrǵyzstan ІІM Jol qozǵalysy qaýipsizdigin qamtamasyz etý bas basqarmasyna silteme jasap.
Vedomstvonyń statıstıkalyq derekterine sáıkes, elde úsh jyl qatarynan jol-kólik oqıǵasynyń kórsetkishteri tómendemeı tur. Atap aıtqanda, 2020 jyly 6126 JKO tirkelgen (754 adam qaza tapty, sonyń ishinde 93 bala, 9227 adam zardap shekti), 2021 jyly - 7438 JKO (869 adam qaza tapty, onyń ishinde 111 bala, 11 370 adam jaralandy), 2022 jyly - 7040 JKO (690 adam qaza tapty, onyń ishinde 103 bala, 11 049 azamat jaraqat aldy).
Joldaǵy qaýipsizdikti arttyrý maqsatynda jol qozǵalysy erejelerin buzǵany úshin aıyppuldar kólemi kóbeıtildi:
- kólik quralyn júrgizý quqyǵynsyz basqarǵany úshin aıyppul mólsheri 5,5 myń somnan 15 myń somǵa deıin ósti (shamamen 172 dollar), jeńildik qarastyrylmaǵan;
- baǵdarshamnyń qyzyl túsine nemese trotýar boıymen júrgen kólikter úshin 3 myń somnan 5 myń somǵa deıin (shamamen 57 dollar);
- jyldamdyqty 40-60 km/saǵ asyrǵany úshin- 5,5 myń somnan 7,5 myń somǵa deıin (shamamen 86 dollar);
- 60 km/saǵ jáne odan da kóp asyp ketkeni úshin - 7,5 myń somnan 15 myń somǵa deıin (shamamen 172 dollar);
- qarsy jolaqqa shyqqany úshin - 5,5 myń somnan 15 myń somǵa deıin (shamamen 172 dollar);
- avtobuzaqylyq úshin - 7,5 myń somnan 15 myń somǵa deıin (shamamen 172 dollar). Bul rette qaıta buzǵany úshin kólikti basqarý quqyǵynan 6 aı merzimge aıyrý kózdeledi;
- JKO jasaǵan jáne qylmystyq jazalanatyn is-áreket belgileri kózdelmegen oqıǵa ornynan jasyrynǵan júrgizýshi 6 aı merzimge avtokólikti basqarý quqyǵynan aıyrylady (buryn 10 myń som aıyppulmen shektelgen);
- jol erejesin bir jyl ishinde 3 jáne odan da kóp buzǵany úshin kýálikke emtıhandy qaıta tapsyrý taǵaıyndalady;
- jalǵan nómirler qoıylǵan kólik quralyn basqarǵany úshin 20 myń som (shamamen 229 dollar) aıyppul salynady. Qaıta buzǵandar 1 jyl merzimge júrgizýshi kýáliginen aıyrylady;
- avtokólikti mas kúıinde júrgizgeni úshin júrgizýshi kýáliginen bir jylǵa, qaıta buzǵany úshin úsh jylǵa aıyrý kózdelgen.
