Qyrǵyzstanda Jogorký Kenesh depýtaty qazaq dıasporasynyń tóraǵasy bolyp saılandy

BІShKEK. QazAqparat - Bishkekte Qyrǵyzstan Qazaqtary qaýymdastyǵynyń kezekten tys sezi boldy. Onda jańa tóraǵa saılanyp, uıymnyń jarǵysyna túzetýler engizildi, dep habarlaıdy «QazAqparat» HAA «Kabar» agenttigine silteme jasap.

Sezd Qyrǵyz Respýblıkasy Jogorký Keneshiniń depýtaty Gúlshat Asylbaevany biraýyzdan qazaq dıasporasynyń tóraǵasy etip saılady.

Ol sezd qatysýshylaryna ózine senim artqany úshin alǵys bildirip, Qaýymdastyqtyń eldiń qoǵamdyq-saıası ómirindegi mańyzyn tilge tıek etti. Qyrǵyzstan halqynyń birligin nyǵaıtý máselelerinde memlekettik bıliktiń barlyq tarmaǵymen ózara yqpaldastyǵyn atap kórsetti.

Gúlshat Asylbaeva shara qatysýshylaryn Qurban aıtpen quttyqtap, birlik, yntymaq, eldiń beıbit gúldenýin tiledi.

Odan ári Qaýymdastyqtyń aldaǵy damý máseleleri talqylanyp, josparlar belgilendi.