Qyrǵyzstanda jaryqty ara-tura sóndirý sharasy engizilmek
BІShKEK. KABAR-QazAqparat – Qyrǵyzstannyń ulttyq elektr jelisi jaryq berýde qysqamerzimdi úzilister bolatynyn jáne bul týraly abonentterge eskertilip otyratynyn málim etti, dep habarlaıdy QazAqparat «Kabar» agenttigine silteme jasap.
Kásiporyn málimetinshe, qatty sýyq saldarynan elektr energııasyn tutyný aıtarlyqtaı artqan. Bul elektr jelisi jabdyǵyna shamadan tys júkteme túsiredi. Kúrdeli apattar men energetıkalyq jabdyqtyń isten shyǵýyn boldyrmaý úshin arnaıy sharalar júrgizile bastady.
Buǵan deıin qaı aýdanda, qaı ýaqytta elektr energııasy kóp tutynylatynyn habarlaý múmkin emes edi. Degenmen, sońǵy táýliktegi shamadan tys júktemege baılanysty úzilisterdi taldaǵannan keıin, qandaı aımaqtarda artyq júkteme jáne qysqamerzimdi úzilister kútiletinin anyqtaý múmkindigi paıda boldy. Aımaqtyq elektr jelileri abonentterdi qysqamerzimdi úzilister týraly habardar etedi.
Aýa temperatýrasynyń qalyptan tys sýyq bolýyna baılanysty «Qyrǵyzstan ulttyq elektr jelisi» AQ birqatar sharalardy qolǵa aldy:
- kompanııanyń ortalyq apparaty basshylyǵynyń, barlyq fılıaldar basshylarynyń, sondaı-aq jaýapty mamandar kezekshiligi uıymdastyryldy;
- obektilerde personaldyń qosymsha túngi aýysymy uıymdastyryldy;
- tótenshe jaǵdaılar týyndaǵan jaǵdaıda jedel joıý shemasyn ázirleı otyryp, avarııalyq jóndeý brıgadasy daıyndaldy;
- jóndeý brıgadalary kóliktermen jáne qajetti qosalqy bólshektermen qamtamasyz etilgen.
Kompanııa tótenshe jaǵdaılardy boldyrmaý úshin halyqty jaǵdaıǵa túsinistikpen qaraýǵa jáne elektr energııasyn únemdep tutynýǵa shaqyrdy.
