Qyrǵyzstanda ustalǵan lańkestik toptyń arasynda Qazaqstan azamaty da bar
ASTANA. 17 qyrkúıek. QazAqparat - Qyrǵyzstanda «Sırııadan ótken terrorıster» degen kúdikpen ustalǵan toptyń arasynda Qazaqstan azamaty da bar. Bul týraly aqparatty Qyrǵyzstan memlekettik ulttyq qaýipsizdik komıteti taratqan.
Arnaıy qyzmettiń málimetinde «Islam jıhady odaǵy» dep atalatyn kúdikti toptyń tamyz aıynyń sońynda, Shanhaı Yntymaqtastyǵy Uıymynyń Bishkektegi sammıti qarsańynda, Osh oblysynda qolǵa túskeni aıtylǵan.
«Sırııadan Qyrǵyzstanǵa terrorıstik-dıversııalyq aktsııalardy iske asyrý maqsatymen jiberilgen toptyń quramynda Qazaqstan Respýblıkasynyń bir azamaty men Osh oblysynda týyp-ósken Qyrǵyz Respýblıkasynyń eki azamaty bolǵan, olar Sırııada terrorlyq qurama qatarynda úkimet kúshine qarsy áskerı is-qımyldarǵa qatysqan», delingen Qyrǵyzstan arnaıy qyzmetiniń aqparatynda.
Qyrǵyzstan memlekettik ulttyq qaýipsizdik komıteti «bul top músheleriniń ústinen qozǵalǵan qylmystyq is boıynsha júrgizilgen tergeý barysynda olardy terrorlyq uıymdardyń basshylary men ıdeologtary Bishkek jáne Osh qalalarynda shý týǵyzatyn terrorlyq aktsııalar jasaý maqsatymen Sırııadan Qyrǵyzstanǵa arnaıy jibergeni anyqtaldy» dep habarlady Azattyqtyń Qyrǵyz qyzmetinen.
