Qyrǵyzstanda ushaq apaty ornynda izdestirý jumystary qaıta jańǵyrdy
ASTANA. QazAqparat - Qyrǵyzstanda Boeing 747-400 júk ushaǵy qulaǵan orynda izdestirý jumystary qaıta jańǵyrdy, dep jazdy RBK.
Jaqynda, 16 qańtar kúni Bishkektiń Manas áýejaıyna jaqyn Dacha-Sýý aýylynda Gonkongten Túrkııaǵa bet alǵan júk ushaǵy qulady.
Seısenbi kúni apat ornyna Halyqaralyq avıatsııa komıtetiniń mamandary keledi dep kútilýde. Olar «ushaqtyń artqy bóligi men fıýzelıaj bólikteri jatqan oryndy tekseredi», - dedi «Interfaks» agenttigine apat sebepterin anyqtaıtyn úkimet shtabynyń ókili. Sondaı-aq, tekserýge ushaq tıesili bolǵan túrkııalyq ACT Airlines kompanııasynyń ókilderi de qatysady.
Qulaǵan oryn zerttelgen soń, úı tóbelerin jaýyp qalǵan synyqtardy alady,onyń astynda da máıitter jatýy múmkin. «Ázirge kóz jumǵan 32 adam men tabylǵan 9 fragment týraly aıtyp otyrmyz», - dedi agenttikke suhbat berýshi.
Qyrǵyzstan Densaýlyq saqtaý mınıstrligi 36 adamnyń mert bolǵanyn, 32 adamnyń aty-jóni anyqtalǵanyn habarlady. Qurban bolǵan 32 adamnyń tórteýi - túrik ushaǵynyń ekıpajy jáne 28-i - Qyrǵyzstan azamattary.
Ushaq Gonkongten Ystanbulǵa bet alǵan, apat saldarynan eldi mekende 32 úı qıraǵan. Aldyn ala boljam boıynsha, áýe apaty «ushqyshtyń qateliginen» bolǵan.
