Qyrǵyzstanda ulttyq aza tutý kúni jarııalandy
BІShKEK. QazAqparat – Qyrǵyzstanda 19 qyrkúıek qyrǵyz-tájik memlekettik shekarasyndaǵy qaqtyǵystar kezinde azamattardyń qaıtys bolýyna baılanysty ulttyq aza tutý kúni bolyp jarııalandy, dep habarlaıdy QazAqparat menshikti tilshisi.
Qyrǵyzstan Prezıdenti Sadyr Japarov qol qoıǵan Jarlyqqa sáıkes, ulttyq aza tutý kúni eldiń búkil aýmaǵynda, sondaı-aq shet elderdegi dıplomatııalyq jáne konsýldyq mekemeler ǵımarattarynda respýblıkanyń memlekettik týy tómen túsirilip, oıyn-saýyq merekeleri ótkizilmeıdi, kóńil kóteretin tele-radıobaǵdarlamalar kórsetilmeıdi.
Buǵan deıin habarlaǵanymyzdaı, Qyrǵyzstan men Tájikstan prezıdentteri Samarqandaǵy Shanhaı Yntymaqtastyq Uıymynyń (ShYU) sammıti aıasynda qyrǵyz-tájik shekarasyndaǵy jaǵdaı boıynsha kelissózder júrgizdi.
Aıta keteıik, Tájikstan men Qyrǵyzstan shekarasyndaǵy qaqtyǵys sársenbi, 14 qyrkúıekte bastalǵan bolatyn. Qyrǵyzstan shekara qyzmeti tájik áskerılerin ortaq shekaranyń belgilenbegen ýchaskesinde pozıtsııa ustandy dep aıyptady. Tájik tarapy óz sarbazdaryna sebepsiz oq jaýdyrǵanyn alǵa tartady.
