Qyrǵyzstanda turǵyn úıdi satý jáne satyp alý kezinde saqtandyrý mindetti bolýy múmkin
BІShKEK. QazAqparat - Qyrǵyzstanda turǵyn úıdi satyp alý-satý mámilelerin jasaý kezinde jyljymaıtyn múlikti órt jáne tabıǵı apattan saqtandyrý polısiniń bolýy mindetti talapqa aınalady.
Tıisti zań jobasyn Qyrǵyzstan Respýblıkasynyń Ekonomıka jáne saýda mınıstrligi qoǵamdyq talqylaýǵa shyǵardy, dep habarlaıdy QazAqparat tilshisi Qyrǵyzstan Respýblıkasy Mınıstrler kabınetiniń saıtyna silteme jasap.
Qujatqa sáıkes, jyljymaıtyn múlikti mindetti saqtandyrý júıesi órt jáne dúleı zilzala kezinde keltirilgen zalaldy tez arada óteýge, turǵyn úı-kommýnaldyq sharýashylyq salasyndaǵy tótenshe jaǵdaılardyń saldaryn joıýǵa arnalǵan memleket shyǵyndaryn qysqartýǵa, saqtandyrý júıesin kezeń-kezeńimen jetildirýge, el azamattarynyń saqtandyrý mádenıetin arttyrýǵa septigin tıgizip, turǵyn úıge keltirilýi múmkin materıaldyq zalaldy óteýdi jáne búlingen turǵyn úı-jaılardy qalpyna keltirýdi, sondaı-aq bıýdjettiń kiris bóligin tolyqtyrýdy qamtamasyz etedi.
Mindetti saqtandyrý júıesin nyǵaıtý tótenshe jaǵdaı kezinde halyqty zalaldy ýaqtyly óteýmen qamtamasyz etýge, azamattardyń qarjylyq tólem qabilettiligin saqtaýǵa jáne zalaldy óteýdiń memlekettik emes kózin qalyptastyrýǵa múmkindik beredi.
