Qyrǵyzstanda ShYU-ǵa múshe memleketterdiń lańkestikke qarsy oqý-jattyǵýy bastaldy
Saltanatty is-sharaǵa bes eldiń, ıaǵnı, Qazaqstan Respýblıkasy, Qyrǵyz Respýblıkasy, Qytaı Halyq Respýblıkasy, Reseı Federatsııasy, Tájikstan Respýblıkasy Qarýly Kúshteriniń áskerı kontıngentteri qatysty. Jalpy alǵanda, oqý-jattyǵýǵa 2 myńǵa jýyq áskerı qyzmetshi, shamamen 300 birlik áskerı tehnıka, olardyń birshamasy jańǵyrtylǵan jáne zamanaýı qondyrǵymen jabdyqtalǵan, sondaı-aq, jerústi áskerlerdiń is-qımylyn qalqalaýdy qamtamasyz etýge arnalǵan 40-qa jýyq birlik jaýyngerlik avıatsııa tartyldy.
«Beıbit mıssııa - 2016» birlesken oqý-jattyǵýynyń jetekshisi polkovnık R. Muqambetovtyń aıtýynsha, mundaı oqý-jattyǵýlardyń ótkizilýi qazirgi zamannyń shynaıylyǵymen qabyldanǵan jáne ShYU jaýapkershilik óńirinde jáne jalpy álemde qalyptasqan halyqaralyq jaǵdaı negizinde óziniń ózektiligi men mańyzdylyǵyn birneshe márte dáleldep te qoıǵan.
«Oqý-jattyǵýdyń qoıylǵan maqsattaryna qol jetkizý úshin barlyǵymyz birge barynsha kúsh-jigerimizdi salatynymyzǵa senimdimin. Sebebi, qazirgi oqý-jattyǵýlar óziniń arnalýynan, «jaýyzdyqtyń úsh kúshimen», ıaǵnı, lańkestik, ekstremızm jáne separatızmmen kúresýden basqa, memleketterimizdiń qarýly kúshteriniń anaǵurlym tyǵyz áskerı yntymaqtastyǵyna yqpal etedi», - deıdi R. Muqambetov.
QR Qorǵanys mınıstrligi baspasóz qyzmetiniń habarlaýynsha, Qazaqstannan oqý-jattyǵýǵa QR QK Aeroutqyr áskerleriniń áskerı qyzmetshileri qatysýda.
