Qyrǵyzstanda sheteldik ınvestıtsııa kólemi ósti

BІShKEK. QazAqparat – Qyrǵyzstanda 2022 jyldyń qorytyndysy boıynsha elge tartylǵan sheteldik ınvestıtsııa kólemi 4%-ǵa ósip, 1 046, 1 mln AQSh dollaryn qurady, dep habarlaıdy QazAqparattyń menshikti tilshisi.

Qyrǵyzstannyń Ulttyq statıstıka komıteti jarııalaǵan derekterge sáıkes, tikeleı sheteldik ınvestıtsııanyń 95%-dan astamy paıdaly qazbalardy óndirýge, óńdeýshi ónerkásip, qarjy jáne saqtandyrý, kóterme jáne bólshek saýda, sondaı-aq aqparat pen baılanys salasyna baǵyttalǵan.

2022 jylǵy sheteldik ınvestıtsııa 2021 jyldyń kórsetkishterimen salystyrǵanda Koreıa Respýblıkasynan quıylǵan ınvestıtsııa – 18,1 esege, Kýveıtten – 15,4 ese, Japonııa – 11,1 ese, BAÁ – 5 ese, Germanııa – 2,6 ese, Túrkııadan – 1,4 esege ósken.

Sonymen qatar osy kezeńde TMD elderinen tartylǵan ınvestıtsııa kólemi azaıǵan. Máselen, Qazaqstannan 20,1%-ǵa jáne Reseı Federatsııasynan 9,7%-ǵa qysqarǵan. Jalpy Qyrǵyzstan ekonomıkasynyń negizgi ınvestorlary – Túrkııa (30,7%), Qytaı (26,3 %), Nıderlandy (5,9%) men Ulybrıtanııa (2,8%).