Qyrǵyzstanda seısmıkalyq qaýipsizdik baǵdarlamasy jasalýda
BІShKEK. 13 qańtar. QazAqparat /Arnur Rahymbekov/ - Qyrǵyz Respýblıkasy Úkimetiniń janyndaǵy Sáýlet jáne qurylys jónindegi memlekettik agenttikte vedomstvo basshysy Qanybek Narbaevtyń tóraǵalyǵymen jumys keńesi ótip, onda 2011-2015 jyldarǵa arnalǵan Qyrǵyz Respýblıkasynyń seısmıkalyq qaýipsizdik baǵdarlamasyn ázirleý jáne ony júzege asyrý máseleleri talqylandy.
Qanybek Narbaev atalmysh jobany júzege asyrýdyń mańyzdylyǵyna erekshe toqtalyp ótti. «Qyrǵyzstannyń seısmıkalyq belsendi aýmaqta ornalasqany, onyń aýmaǵynda 8,9 jáne 9 baldan asatyn dúmpýlerdiń bolý yqtımaldyǵy jalpyǵa aıan. Tek qana sońǵy bes jyldyń ishinde respýblıkada úsh qatty jer silkinisi bolyp, úlken materıaldyq shyǵyn ákeldi, adam ólimderine sebep boldy. Sondyqtan da, seısmıkalyq ahýal elimizdiń qurylysy salasyna erekshe talap qoıady, qoldanystaǵy jáne jańadan salynyp jatqan nysandardyń seısmornyqtylyǵyn arttyrý maqsatynda uzaqmerzimdik jáne maqsatty memlekettik saıasat júrgizý qajet», dep málim etti ol.
