Qyrǵyzstanda sel saldarynan 71 úı sý astynda qaldy
BІShKEK. QazAqparat - Búgin Qyrǵyzstan Respýblıkasynyń premer-mınıstri Temir Sarıevtiń tapsyrmasymen tótenshe jaǵdaılar mınıstri Kýbatbek Boronov Talas oblysyna shyqty. Bul týraly vedomstvonyń baspasóz qyzmetinen habarlady.
Jýyrda Talas oblysynyń Kara-Koo jáne Chandy aýdandarynda tolassyz jańbyr saldarynan eldi mekender zardap shekti.
Aldyn ala boljam boıynsha, Aral aýylynda tekserilgen 118 úı sharýashylyǵynyń 71 úıi sý astynda qaldy, tórteýi apattyq jaǵdaıda, 10 turǵyn úıdiń jertólelerin sý basty, bir qora buzyldy. Aýyl sharýashylyǵyna paıdalanatyn jerdiń 18,5 gektary sý astynda qaldy. Andash kanalyna zaqym keltirildi. Qutqarýshylar men jergilikti turǵyndar tazartý jáne qalypqa keltirý jumystaryn atqaryp jatyr. Adam shyǵyny týraly habarlanbady. Eldiń TJM saıtynda kelesi eskertý jarııalanǵan: «11-13 mamyr aralyǵynda tolassyz jańbyr saldarynan taýly aımaqtarda sel bolyp, ózenderde sý deńgeıi kóterilýi múmkin».
