Qyrǵyzstanda saılaýaldy naýqany toqtatylýy múmkin - Roza Otynbaeva
ASTANA. Qyrkúıektiń 7-si. QazAqparat - Qyrǵyzstan Prezıdenti Roza Otynbaeva parlamenttik saılaýǵa qatysýshy saıası kúshterge eskertý jasap, eger olar eldegi jaǵdaıdy turaqsyzdandyratyn bolsa, saılaýaldy naýqannyń toqtatylatynyn málim etti. Bul týraly «RIA «Novostı» agenttigi habarlady.
Partııalyq júıe boıynsha parlamenttik saılaý qazannyń 10-yna belgilengen. Parlamenttik saılaýǵa qatysatyn kandıdattardyń tizimin Ádilet mınıstrligi tirkegen 140-tan astam saıası birlestiktiń atynan 29 partııa berip otyr.
Parlamenttik saılaý sáýir aıynda Qurmanbek Bakıev taǵynan taıdyrylǵannan keıin qalyptasqan bılik ınstıtýttaryn zańdastyrýǵa jasalǵan kezekti qadam bolmaq. Qyrǵyzstanda jańa bıliktiń qalyptasý úderisi oqtyn-oqtyn oryn alǵan azamattyq tártipsizdiktermen qatar júrip jatyr.
«Eger, qandaı da bir partııa halyqty qorqytýmen aınalysatyn bolsa, ol faktiler boıynsha zańǵa sáıkes qatań sharalar qabyldaýǵa men ýáde beremin. Men tótenshe jaǵdaı engizip, saılaýdy toqtata alatynymdy túsinýlerińiz kerek. Memlekettiń tutastyǵy men halyqtyń birligi - depýtattyq mandattan mańyzdyraq», - dep málim etti qyrǵyz memleketiniń basshysy seısenbi kúni parlamenttik saılaýǵa arnalǵan «dóńgelek ústel» otyrysynda.
Eldiń jańa Konstıtýtsııasyna sáıkes, zańdy parlamenti saılanǵannan keıin ǵana Qyrǵyzstan parlamenttik respýblıka atanady. El prezıdenti tek ókildik qyzmet atqaratyn bolady da, respýblıkany basqarý jónindegi is júzindegi ókilettik parlamenttik kópshilik taǵaıyndaıtyn premer-mınıstrge aýysady.
