Qyrǵyzstanda saıası ahýal memlekettik bıliktiń tolyq baqylaýynda - Qubatbek Baıbolov
ALMATY. Tamyzdyń 9-y. QazAqparat /Erbol Turymbetov/ - Qyrǵyzstanda saıası ahýal memlekettik bıliktiń tolyq baqylaýynda. Bul týraly Qyrǵyzstannyń Іshki ister mınıstri Qubatbek Baıbolov búgin Almatyda ótken baspasóz máslıhatynda málimdedi,
dep habarlaıdy QazAqparat.
Onyń aıtýynsha, burynǵy prezıdent Qurmanbek Bakıevtiń 2 aǵaıyny men basqa da birneshe týystary ustalǵan. Olar Bakıev bıligi kezinde birqatar joǵary laýazymdarda otyrǵan. Al úkimetke qarsy sońǵy sherýdiń basshysy Urmat Baryqtabasov saıası qylmysker bolyp tabylady.
«Elimizdegi saıası ahýaldy memleket tolyq baqylaýǵa alǵan. Sońǵy oqıǵaǵa baılanysty búginge deıin 2500 qylmystyq is qaralyp, onyń 317-si azamattardyń sottalýymen aıaqtaldy. Degenmen, eldiń ár aımaqtarynda qylmystyq toptar áli de bar. Máselen, Ystyqkól oblysy aýmaǵynda ІІM-ne belgili eki qylmystyq top tirkeldi. Olardyń ishinde birqatar óreskel qylmys jasaýshylar quryqtalyp úlgerdi. Al Urmat Baryqtabasov qyrǵyz elimen qatar, Qazaqstannyń da azamattyǵyn alǵan. Ol Qyrǵyzstanda 2 úlken saıası qylmys jasaǵan bolsa, Qazaqstanda da ekonomıkalyq qylmys jasaǵany anyqtalyp otyr», dedi Q. Baıbolov.
Sonymen qatar, mınıstr qyrǵyz eli aýmaǵynda BAQ ókilderine bılik tarapynan eshqandaı shekteý qoıylmaıtyndyǵyn basa aıtty. Sonyń ishinde Qazaqstan azamattary men jýrnalısterine de esh qaýip bolmaıtyndyǵyn, ondaı is tirkelgen jaǵdaıda ol tez arada ońtaıly sheshimin tabatyndyǵyn málim etti.
