Qyrǵyzstanda referendýmge qarsy qoltańbalar jınaý bastaldy
BІShKEK. QazAqparat - Qyrǵyzstanda 2016 jyldyń 4 qazanynda ótedi dep josparlanǵan Konstıtýtsııaǵa ózgerister engizý boıynsha referendýmǵa qarsy petıtsııaǵa qol jınalyp jatyr. Bastamany «Referendýmǵa qarsymyz!» qoǵamdyq qozǵalysy kóterdi.
«Qazirgi zańǵa, óz reglamentine qaıshy sharalardy qabyldap jatqan jáne qoǵamnyń ótinishterine qulaq aspaǵan Jogorký Kenesh áreketteri burys sheshimderdi qabyldaý qaýpin arttyryp, parlament prezıdenttiń basqarýyndaǵy organǵa aınalǵanyn dáleldedi», - delingen aktsııa uıymdastyrýshylarynyń málimdemesinde.
«Referendýmǵa qarsymyz!» qozǵalysynyń lıderleri Konstıtýtsııaǵa túzetý boıynsha úderistiń legıtımdi emes ekenin atap ótti.
«Referendýmǵa qarsy jáne Jogorký Keneshti taratý týraly azamattardyń qoldaryn jınaý boıynsha beıbit mıssııany bastap, buqaralyq narazylyq sharalaryn ótkizý quqyǵyn ózimizde qaldyramyz», - delingen narazylyq bildirýshilerdiń málimdemesinde.
Eske sala keteıik, Qyrǵyzstannyń negizgi zańyna túzetýler engizýde premer-mınıstr men parlamenttiń ókildigin kúsheıtý qarastyrylǵan.
