Qyrǵyzstanda referendým men jergilikti keneshterdiń saılaýy aıaqtaldy
BІShKEK. QazAqparat - Búgin saǵat 20-00-de Qyrǵyzstannyń barlyq aımaǵynda jergilikti keneshter saılaýy men referendýmda daýys berý sharalary aıaqtaldy, dep habarlaıdy «QazAqparat» HAA-niń Bishkektegi menshikti tilshisi.
Referendým men jergilikti keneshter saılaýyn ótkizý úshin 2 myń 365 biriktirilgen ýchaskeler ashyldy, olar tańǵy saǵat 8-00-den jumys isteı bastady. Daýys berý sharasy bastalysymen keıbir ýchaskelerde tehnıkalyq problemalar paıda boldy. Naqtyraq aıtqanda onda avtomatty qurylǵylar saılaýshyny birden tanı almady, al, avtomatty daýys sanaıtyn qurylǵylar bıýlletenderdi qabyldamady. Sonymen qatar elektr qýatymen qamtamasyz etý baǵytynda da problemalar týyndady.
Alaıda Ortalyq saılaý komıssııasynyń basshysy Nurjan Shaıldabekovanyń sózinshe, bul problemalar jappaı oryn alǵan joq jáne olardy tıisti mamandar birden rettedi.
Saǵat 18-00-degi málimetter boıynsha, referendýmǵa 867 141 qyrǵyzstandyq qatysty. Bul elde tirkelgen 2 mln 851 myń 952 saılaýshynyń 30,41 paıyzy.
Osylaısha, referendýmnyń ótýi úshin qajetti eń tómengi kórsetkishke qol jetkizildi jáne tıisti zań talaptaryna sáıkes, referendým ótkizilgen bolyp esepteledi.
Saǵat 20-00-den soń barlyq málimetter avtomatty túrde sanaý úshin OSK-nyń ortalyq serverine jiberiledi. Budan soń komıssııa ókilderi bıýlletenderdi jeke-jeke qolmen sanap shyǵady.
Saılaý men referendýmnyń qorytyndy nátıjeleri dúısenbi, 12 jeltoqsan kúni belgili bolady.
Aıta keteıik, saılaý 389 aýyldyq, 22 qalalyq keneshterde ótti. Bul aımaqtardan 7,5 myńnan astam depýtat saılanýy tıis.
Referendýmda qyrǵyzstandyqtar Konstıtýtsııaǵa engiziletin ózgeristerdi qoldaıtynyn ne oǵan qarsy ekenin bildiredi.
