Qyrǵyzstanda prezıdenttik saılaý ótýde
BІShKEK. 30 qazan. qazAqparat /Arnur Rahymbekov/ - Búgin Qyrǵyzstanda Prezıdent saılaýy ótýde. Respýblıka tarıhynda tuńǵysh ret ókimet bıligi bir Prezıdentten ekinshisine beıbit jolmen ótpek.
Saılaý bıýlletenderine on alty úmitkerdiń aty-jóni jazylǵan. Alǵashqyda olardyń sany - seksen úsh bolǵan, saılaýaldy doda barysynda olardyń sany on altyǵa deıin qysqardy. Úmitkerlerdiń kópshiligi ózdiginen bas tartty, birqatary Ortalyq saıaý komıssııasynyń talaptarynan óte almady.
Saılaýshylar tirkegen jerinen nemese málimdelgen turǵylyqty jerinen daýys berýde. Saılaý kezinde saılaýshylardyń sol qolynyń basbarmaǵyna tyrnaǵynyń ústine belgi salynady. Ony jýyp ketirý qıyn, 10 kúnge deıin saqtalady, deıdi ortalyq saılaý komıssııasynyń ókilderi.
QR Prezıdentin saılaý úshin 2318 saılaý ýchaskesi jasaqtaldy; onyń 2 289-y - Qyrǵyzstanda jáne 29-y shetelderde - QR elshilikteri men konsýldyqtarynda. Reseıde - 3, Qazaqstanda 2 (Astana jáne Almaty), Ózbekstanda, Tájikstanda jáne Túrkimenstanda - bir-birden, Eýropa men Taıaý Shyǵys elderinde de osynsha saılaý ýchaskeleri qurylǵan.
Qyrǵyzstan OSK málimetteri boıynsha, saǵat 15.00-te 1 mıllıon 104 myń 228 adam (saılaýshylardyń jalpy sanynyń 40-45 paıyzdaıy) daýys berdi. Qyrǵyzstan astanasynda saılaýshylardyń belsendiligi joǵary - 41,93 paıyz. Ońtústiktegi Osh qalasynda daýys berýge qatysý belsendiligi tómen - 25,98 paıyz.
