Qyrǵyzstanda pedofılder qaptap barady
ASTANA. 20 mamyr. QazAqparat - Qyrǵyzstanda pedofılder qaptap barady. Jyl basynan beri Bishkek qalasynyń ózinde balalarǵa qııanat jasaǵan 34 qylmys tirkelipti.
Aıyrqalpaqty aǵaıyndardyń atqaminerleri buqaralyq aqparat quraldary arqyly ata-analarǵa balalaryn qaraýsyz qaldyrmaý týraly eskertý jasap, dabyl qaǵýda. Sondaı-aq Qyrǵyz bıligi búldirshinderdi qorlaǵan azǵyndardy hımııalyq jolmen kestirýdi usynyp, zańǵa ózgertý engizbek nıette.
Bul týraly BNews.kz habarlaıdy.
KTK telearnasynyń habarlaýynsha, 43 jastaǵy Nıkolaı esimdi pedofıl 7 jasar qyzdy adam aıaǵy baspaıtyn jerge aldap aparyp, oıyna kelgenin istegen.
Balanyń baqyryp jylaǵan daýsyna júgirip kelgen jurtqa Nıkolaı ózin qyzdyń týǵan aǵasymyn dep tanystyrypty. Dese de bir báleden kúdiktengen azamattar mılıtsııaǵa habar bergen. Tártip saqshylary jetkennen keıin ǵana naǵyz sumdyqtyń beti ashyldy. Qazir pedofıl sottyń úkimin kútip, qamaýda otyr. Al búldirshin psıhologtardyń jiti baqylaýynda. Onyń anasy bolsa, aıýandyq jasaǵan azamatty eń qatal jazaǵa kesýin talap etýde.
Taǵy bir sumdyq jaǵdaı Ystyqkól oblysynda oryn alǵan. Anasy 12 jastaǵy qyzynyń júkti ekenin altynshy aıynda bir-aq bilipti. Sóıtse, jasóspirimdi ógeı ákesi bir jyldaı zorlap kelgen eken. Al jýyrda Bishkek qalasynda balalardy jalańashtap sýretke túsirip, artynsha aram oıyn júzege asyryp júrgen fotograf quryqtaldy. Jalpy jyl basynan beri kórshi elde osy ispettes 34 qylmys tirkelgen. Qyrǵyz bıligi qaptaǵan pedofılderden qutylý úshin olardy hımııalyq jolmen kestirýdi usynyp otyr. Qazir tıisti zań jobasy da daıyndalýda. Tártip saqshylary bolsa, ata-analarǵa balalarynan kóz jazyp qalmaýdy teledıdar arqyly eskertýdi bastaǵan.
